مېري کوم د پریانکا چوپړا د فلم په اړه: زما یوازې ۱۰ سلنه کړاوونه یې وښودل

مېري کوم، د هند افسانوي باکسره، په هغه فلم نیوکه کړې چې په ۲۰۱۴ کال کې د هغې د ژوند په اړه جوړ شو او پریانکا چوپړا پکې د هغې رول لوبولی و. د هندوستان ټایمز د راپور له مخې، هغې د «بګ باس» له رښتیني خپرونې څخه له وتلو وروسته ویلي چې دې فلم د هغې د ژوند او هڅو حق نه دی ادا کړی.

مېري کوم د دې پوښتنې په ځواب کې چې آیا د دې فلم دویمه برخه به جوړه شي، وویل چې اوس دویمې برخې ته اړتیا نه ویني، ځکه ټول د هغې په کیسه خبر دي او د ژوند لاره یې هم په فلم کې راغلې او هم د هغې د یادښتونو په کتاب «نه ماتېدونکې» (Unbreakable) کې. خو سمدستي یې زیاته کړه: «د ژوند فلم ریښتینی نه و. ما احساس کړل چې د کیسې ځینې برخې ریښتیا نه دي. زما یوازې ۱۰ سلنه سختۍ او زیار پکې وښودل شول.» د هغې په وینا، څوک چې غواړي د هغې اصلي کړاوونه وویني، باید کتاب یې ولولي.

دې اتلې د «بګ باس» په اړه هم خبرې وکړې او ټینګار یې وکړ چې په دې خپرونه کې یې خپل ریښتینی ځان ښودلی دی. هغې وویل: «ما ډرامه نه ده کړې. هغه کسان چې ما ښه پېژني، په دې پوهېږي.» مېري کوم یادونه وکړه چې شل کاله یې د باکسینګ په رینګ کې مبارزه کړې او خپل ژوند یې سپورت ته وقف کړی دی، او زیاته یې کړه: «څوک نشي کولای اووه اونۍ پرله پسې ډرامه وکړي.» د هغې په خبره، خلکو اوس ریښتینې مېري کوم هم وپېژندله.

د اومنګ کمار په لارښوونه جوړ شوي «مېري کوم» فلم د هغې کیسه د منیپور ایالت د ماشومتوب له کلونو څخه د نړیوالې اتلولۍ تر لاسته راوړلو پورې بیانوله او د مسلکي سپورت، مورتوب او کورني ژوند تر منځ د توازن ساتلو ستونزې یې هم ښودلې. منتقدینو دا فلم وستایه او د هند ملي فلمي جایزه یې د ټولې کورنۍ لپاره د غوره سرګرمونکي او سالم فلم په برخه کې وګټله؛ خو د مېري کوم نوې خبرې ښيي چې د کیسې اصلي اتله لا هم دا فلم د خپل ژوند بشپړه کیسه نه ګڼي.

سرچینه: Hindustan Times

انځور: Prdp7777 / Wikimedia Commons، CC0 (پرې شوی)