د ډیلي محکمې پر نورا فتحي نیوکه وکړه: د سوکېش چندراشېکر د ۲۰۰ کروړیزې زور اخیستنې دوسیه؛ «له محکمې سره لوبې مه کوئ»
د ډیلي یوې محکمې چې نورا فتحي یې د سوکېش چندراشېکر پورې تړلې د ۲۰۰ کروړه روپیو د زور اخیستنې او پیسو مینځلو په دوسیه کې د شاهد په توګه رابللې وه، د دې لوبغاړې پر چلند نیوکه وکړه.
د بالیووډ لوبغاړې او نڅاګرې نورا فتحي نوم یو ځل بیا د سوکېش چندراشېکر د جنجالي دوسیې له امله په خبرونو کې دی. د نیوز۱۸ د راپور له مخې، د ډیلي «روز اېوینیو» محکمې چې هغه یې د ۲۰۰ کروړه روپیو د زور اخیستنې او پیسو مینځلو په دوسیه کې د شاهد په توګه رابللې وه او د نومبر په ۲مه یې په غونډه کې د حاضرېدو غوښتنه کړې وه، د دې لوبغاړې پر چلند ناخوښي څرګنده کړه.
د دې راپور له مخې، قاضي د نورا فتحي چلند مناسب ونه باله او د هغې له وکیل یې وغوښتل چې خپل موکل ته ووایي «له محکمې سره لوبې ونه کړي». دا چې د محکمې د دې غبرګون اصلي لامل څه و، په اړه یې نور جزئیات نه دي خپاره شوي. مهمه دا ده چې نورا فتحي په دې دوسیه کې شاهده ده، تورنه نه ده.
دا دوسیه د ۲۰۲۱ کال پیل ته ورګرځي. د هند د اجرایوي ادارې (ED) تور دا دی چې سوکېش چندراشېکر په داسې حال کې چې په زندان کې و، د «رنبکسي» درملو شرکت د پخوانیو مشرانو ملوندر سنګ او شیوندر سنګ له مېرمنو څخه شاوخوا ۲۰۰ کروړه روپۍ په زور اخیستې دي. د دې ادارې په وینا، هغه په دې پیسو خپلو نږدې کسانو ته، چې جېکلین فرنانډېز او نورا فتحي هم پکې شاملې دي، ګرانبیه ډالۍ او موټرونه اخیستي دي.
نورا فتحي مخکې د اجرایوي ادارې په پوښتنو ګروېږنو کې ویلي وو چې په یوه مېلمستیا کې د پروګرام لپاره بلل شوې وه او د نغدي معاش پر ځای ورته ګرانبیه ډالۍ وړاندیز شوې وې، چې یو بياېمډبلیو موټر هم پکې و. هغې ټینګار کړی چې له سوکېش سره یې هېڅ اړیکه نه درلوده، پخپله د هغه د شبکې قرباني شوې او کله چې پوه شوه چې یو څه سم نه دي، ټولې اړیکې یې پرې کړې. خو سوکېش چندراشېکر په خپلو لیکونو کې دا روایت رد کړی دی.
دا دوسیه لا هم په محکمه کې روانه ده او باید وکتل شي چې راتلونکې غونډې به یې څه لوري ته ځي.
سرچینه: News18
اړوند مطالب
نظرونه (۰)