راکول پریت سنګ: «شورپاناکا» هغه کرکټر دی چې تل غلط پوه شوی؛ «رامایانا» نړۍ ته د هند پېژندنه ده

کله چې د «رامایانا» لومړی ټریلر خپور شو، ډېرې خبرې د رام په رول کې د رنبیر کپور او د سیتا په رول کې د سای پلوي د بڼې په اړه وې. خو د ټریلر یوه حیرانوونکې شېبه د شورپاناکا په رول کې د راکول پریت سنګ لنډه ښکارېدنه وه، او اوس پخپله لوبغاړې د دې رول په اړه خبرې کړې دي.

د هندوستان ټایمز د راپور له مخې، راکول د پي ټي آی خبري اژانس سره په مرکه کې وویل چې دوو شیانو دا پروژه ورته په زړه پورې کړه. لومړی دا چې د هغې په وینا «رامایانا» نړۍ ته د هند پېژندنه ده؛ د دې خاورې د تاریخ او باورونو کیسه په داسې فلم کې چې له پیله د نړیوالو لیدونکو لپاره جوړ شوی. دویم دا چې هغه شورپاناکا یو «ډېر پوړ پوړ او غلط پوه شوی» کرکټر بولي چې د کیسې لویه جګړه له هغې پیل شوه. هغې زیاته کړه چې د داسې چا رول لوبول چې ګڼ رنګونه او څېرې لري، ورته ډېر په زړه پورې و.

راکول مخکې هم په ایکس کې د یوه مینه وال لیک بیا خپور کړی و او لیکلي یې وو چې همدې پېچلتیا هغه دې رول ته وهڅوله. د هغې په وینا، تاریخ شورپاناکا یوازې د یوې شېبې له امله یادوي، په داسې حال کې چې د هغې کیسه له دې ډېره پراخه ده. هغې هیله کړې وه چې لیدونکي به له خلاص ذهن سره له دې کرکټر سره مخ شي.

د رامایانا په افسانوي کیسه کې، شورپاناکا ته شوې سپکاوی راون دې ته وهڅاوه چې سیتا وتښتوي، او همدا پېښه د رام او راون ترمنځ جګړې ته ورسېده. په نوي فلم کې یش د راون رول لوبوي.

د هندوستان ټایمز په وینا، دا فلم چې بودیجه یې شاوخوا ۴ زره کروړه روپۍ راپور شوې، د یش او نامیت مالهوترا په تولید او د نیتش تیواري په لارښوونه په دوو برخو کې جوړېږي. لومړۍ برخه د ۲۰۲۶ کال د نومبر په ۵مه سینماګانو ته راځي او دویمه برخه به د ۲۰۲۷ کال د دیوالي شاوخوا پرده ته ورسېږي.

سرچینه: Hindustan Times